Turmush — Кечээ, 25-февралда Б.Сыдыков атындагы Кыргыз-Өзбек эл аралык университетинде ректордун демилгеси менен студенттердин арасында «Кыз-жигит» сармерден оюну болуп өттү. Бул тууралуу окуу жайдан билдиришти.
Сармерденде юридика-экономика факультетинин мырзалары, тарых-филология факультетинин жана Андижан мамлекеттик педагогикалык институтунан академиялык мобилдүүлүк боюнча келген кыздар өз өнөрлөрүн тартуулашты. Студенттер сармердендин эрежесине ылайык «Манас» эпосунан үзүндү айтып, обондуу ырларды аткарып, макал-лакап, жаңылмач айтышып, эки жаат болуп акыйнек ырларын аткарышты.
Кыргыз-Өзбек эл аралык университетинин ректору, профессор Абдилбает Мамасыдыков бул иш-чара атайын Андижан мамлекеттик педагогикалык институтунан академиялык мобилдүүлүк боюнча келген студенттер үчүн уюштурулганын, ал үчүн Андижан мамлекеттик педагогикалык институтунан атайын коноктор чакырылганын айтып, иш-чара өз максатына жеткендигин баса белгиледи. Өзүнүн куйкум сөзү, тамашасы менен сахнанын ажарын ачкан таланттуу студенттерге, уюштуруучуларга, Андижандан келген конокторго ыраазычылыгын билдирди.
Андижан мамлекеттик педагогикалык институтунан келген коноктор мобилдүүлүк боюнча келген студенттерге Кыргыз-Өзбек эл аралык университетинин жамааты жогорку деңгээлде сый көргөзгөнүн белгилеп, «Кыз-жигит» сармерден оюнун Андижан мамлекеттик педагогикалык институтунда дагы уюштурууну сунуштап өтүштү.
Соңунда университеттин жетекчилиги, бириккен профсоюз уюму, тарых-филология факультети тарабынан катышуучуларга диплом жана белектер тапшырылды.
