Turmush — Бүгүн, 6-октябрда Ош мамлекеттик педагогикалык университетинин студенттери белгилүү агартуучу Мамбетасан Ибраев менен жолугушуп, өзгөчө семинарга күбө болушту. Бул тууралуу окуу жайдын басма сөз кызматы билдирди.
Жолугушуу окуу жайдын чоң жыйындар залында уюштурулуп, аны университеттин ректору Бекмурза Зулуев ачып берди. Семинар студенттердин интеллектуалдык дараметин, дүйнө таанымын, китепке болгон мамилесин, билимге сүйүүсүн арттыруу, жогорулатуу таризинде коштолду.
«Тренер семинарда өзүнүн билими, турмуштук тажрыйбаларын жана дүйнөлүк деңгээлге ортоктош болгон ойлорун, идеяларын кеп кылып, азыркы муундун аксаган сапаттарын белгилеп, алдыга умтулууга, көп окуп, билимдүү жаштардын коомун түзүүгө чакырды. Жаштардын кыялдарын курчутуп, бийик-бийик ийгиликтердин ээси болууга үндөдү. Бул менен бирге учурда ар бири окуусу зарыл болгон дүйнөлүк китептер менен тааныштырды. Соңунда катышуучулар бир канча суроолорду узатып, жооп алышып, мыкты мотивациялык семинар үчүн конокко ыраазычылык билдиришти», - деп айтылат маалыматта.
Мамбетасан Ибраев коомдук жана диний ишмер, «Калем» академиясынын негиздөөчүсү. 5 тилде эркин сүйлөп, учурда чет элдик китептерди кыргыз тилине которуп, окурмандарга сунууда.
