Turmush — Жалал-Абад облусунда Улуу Ата Мекендик согуштун ардагерлеринен үчөө калды. Анын бири Мамасали Жумаев. Ал Сузак районуна караштуу Багыш айыл аймагынын Сафаровка айылында жашайт. Анын уулу Үсөн Жумаев менен Turmush басылмасынын аймактык кабарчысы маек курду.
Улуу Ата Мекендик согуштун ардагери Мамасали Жумаевге 1944-жылы согушка чакыруу келген. Жаштык мезгили экинчи дүйнөлүк согушка туш келген ардагерге замандаштарындай эле 3 карындашын, апасын таштап, жашы 18ге толоору менен кан майданга аттанат.
«Жашында атасы каза болуп калгандыктан үй-бүлөсүн багуу жүгү жаш кезинен эле анын мойнунда болчу. 14 жашынан баштап колхоз, совхоздо иштеп баштаган. Зиректиги менен айырмаланган атам 16 жашында совхоздо эсепчилик кызматты аркалап баштаган. Ага чакыруу 1944-жылдын январь айында келген.
Атам согуш мезгилинде Россиянын Владивосток, Волгоград шаарларында болгон. 9-Май — Улуу Жеңишти ошол жакта тоскон. Согуш бүткөн соң Японияга жөнөтүлүп, 3 ай жүргөн. Айрыкча нансыз калган күндөрүн, сазга баткан учурларын көп айтып берди. “Нанды жыттап алып ыйлаганбыз. Бир туурам нанды бир канчабыз бөлүшүп жеген күндөрүбүз болду” деп айтчу», - дейт уулу Үсөн Жумаев.
101 жаштагы атанын 5 уул, 4 кыз, 35 небере, 80 чебере, 2 кыбырасы бар. Балдарынын улуусу 70 жашта болсо, эң кичүүсү 55 жашка чыккан. Кылым карыткан ардагер ата ар бир батасында «тынчтык болсун!» деген сөздү өзгөчө көп айтат.
Облус боюнча Улуу Ата Мекендик согуштун 3 ардагери калган. Алар:
- Базар-Коргон районунун Арстанбап айылынын тургуну Мурза Далиев;
- Ноокен районунун Садырбаев айыл аймагынын тургуну Ормон Дадажанов;
- 5 оруктун ардагери, 1 концлагер туткуну бар.
- Улуу Ата Мекендик согушта ― 1941–1945-жылдагы фашисттик Германиянын совет элине кол салуусуна каршы Жалал-Абад облусунан 30 миңдей адам катышып, анын 18 миңден ашууну кайтпай калган.
