Turmush — Жыл башынан бери өлкөнүн түштүк аймагында издөөдө жүргөн 40 жаран видеокамеранын жардамы менен кармалды. Бул тууралуу бүгүн, 18-апрелде Ош шаарындагы кырдаалдык борбордун ишмердүүлүгүн тааныштыруу учурунда ИИМдин Коомдук коопсуздукту камсыздоо кызматынын ыкчам башкаруу борборунун башчысы Алмазбек Батырбаев билдирди.
Анын айтымында, алардын ичинен 32 жаран жергиликтүү издөөдө, 3 жаран эл аралык издөөдө жүргөн.
«5 жаран дайынсыз жоголгондор. Камералардын орнотулуусу милиция кызматкерлеринин да ишин жеңилдетти. Буга чейин кылмыш жасаган жаранды күндөп издесек, азыр камеранын жардамында батыраак табууга мүмкүн болууда.
Өлкө боюнча кырдаалдык борборго 105 мектептин камералары туташтырылган. Анын ичинен 103 камера Бишкектеги мектептерде, 2 камера Талас облусунда. Башка облустар аракет кылып жатышат, бирок ишке аша элек. Ош шаарына кырдаалдык борбор ачылганда ИИМ тарабынан 22 камера орнотулуп берилди эле. Анын ичинен 12 гана камера иштеп жатат. 10 камера орнотулган жеринен жылдырылган. Жолдорду кеңейтүү иштерине байланыштуу иштебей турат. Ушуну Ош шаарынан келген өкүлдөр карап берсеңер. Ош облусунун аймагында 222, Баткен облусунда 145, Жалал-Абад облусунда 218 камера иштеп жатат», - деди Батырбаев.
Иш-чарага президенттин Ош облусундагы өкүлүнүн орун басары Курбанбек Айтибаев, Ош шаардык мэриясынан өкүлдөр, Ош облусундагы РИИБдин башчылары, район акимдери, орун басарлары катышты.
Район акимдерине, орун басарларына мектептердеги коопсуздукту камсыз кылуу үчүн камераларды орнотуу боюнча сунуштар берилди.
Кырдаалдык борбордо 24 саат бою коомдук коопсуздукту камсыздоо боюнча иш алынып барылат.
