Turmush — Бүгүн, 18-апрелде Ысык-Көл облусунун Тоң районуна караштуу Темир-Канат айылында кар жаады. Бул тууралуу Turmush басылмасына жергиликтүү тургундар билдирди.
Жашоочулар жөнөткөн видеодон айлана аппак карга бөлөнгөнүн көрүүгө болот.
Кыргызгидрометтин маалыматы боюнча, 18-апрелде күндүз Чүй, Ош, Жалал-Абад, Баткен, Ысык-Көл, Нарын облустарынын көпчүлүк аймактарында, Талас облусунун айрым жерлеринде жамгыр, бийик тоолуу райондордо кар жаайт. Ош, Жалал-Абад облустарынын айрым жерлеринде жаан-чачын катуу болот.
Абанын температурасы Ысык-Көл облусу күндүз +8…+13 градус болот.
Ошондой эле Кыргызстандын түндүгүндө 20-апрелге караган түнү жана эртең менен үшүк жүрүшү күтүлөт, деп билдирди Кыргызгидромет.
Түндө жана эртең менен Чүй, Талас облустарынын дыйканчылык аймактарында 0…-2°, Ысык-Көл, Нарын облустарында -1…-3° болору болжолдонууда.
