Turmush — Бакай-Ата районунун Бакай-Ата айылынын 35 жаштагы тургуну Айзат Жамгырчиева таттууларды жасап жатат. Аймактык кабарчы ишкер айымдан кабар алды.
Өзүнүн айтымында, бул ишинен айына 30 миң сом киреше табат.
«Жолдошум экөөбүз 2011-жылы баш кошконбуз. Мен балдар менен үйдө болдум. Былтыр жолдошумдун идеясы менен ушундай таттууларды, нан жасай турган чакан цех ачканбыз. Ичинде экөөбүз иштейбиз. Жалпы 250 миң сом каражат кетиргенбиз. Бул жерде нан, пряник, лагмандын камыры, булочка, оромо, ашлямфу, пирожки, каттама жасайбыз. Жасаган оокаттарыбыз 5 айылдын дүкөндөрүнө таратылат. Бардыгын күн сайын ташып, кайра жаңыртып турабыз.
Ишти жаңы баштаганда коркуу сезими болду. Бышкан оокат калып калбайт дегендей, бышыра бердик. Эл дагы көнүп калды окшойт. Анан ишибиз акырындап турукташып калды. Азыр айына орточо киришебиз 30 миң сомдой болуп жатат. Үйдө отура бергенче жакшы айлык деп ойлойм», - деди ал.
Айзам айым 3 кыз, 1 уулдун апасы.
