Turmush — Ош облусунун Алай районуна караштуу Памир-Алай айыл аймагынын Сары-Таш айылында 150 орундуу мектеп пайдаланууга берилди. Бул тууралуу аталган айыл өкмөттөн билдиришти.
Маалыматка караганда, №39 К.Эсенов атындагы мектеп Кара-Кыргыз автономиялуу облусунун түзүлгөндүгүнүн 100 жылдыгына карата Министрлер кабинетинин төрагасы Акылбек Жапаровдун онлайн катышуусунда ачылды.
Мектептин имараты республикалык бюджеттин эсебинен курулуп, жалпы сметалык баасы 118 млн 411 миң 631 сомду түздү. Ал эми тендердик баасы — 87 млн сом.
Бул иш-чарага президенттин Ош облусундагы ыйгарым укуктуу өкүлүнүн орун басары Талантбек Арстанкулов, Алай районунун акими Чыңгыз Бапаев, райондук мекеме-ишканалардын жетекчилери жана айыл тургундары катышты.
Сары-Таш айылында калктын саны 2500 адамды түзөт.
