Turmush — Баткен облусунун Кадамжай районуна караштуу Кызыл-Булак айылынын тургуну Кайрынса Закирбаева келин болуп келгенде малина өстүрүүнү колго алган. Азыркы тапта салтты бузбай, малина аянтын келинине өткөрүп берүү алдын да турат.
«Мен 30 жыл мурун ушул үй-бүлөгө келин болуп келгем. Ошол учурда корообузда малина өсүп турчу. Бирок малинанын майда сорту болгондуктан, айылдагы көчүп кетип жаткан орус улутундагы аялдын 80 түп малина көчөтүн сатып алгам. Ошол көчөттөр бүгүнкү күнгө чейин мөмөсүн берип келет. Алгач малинаны сатчу деле эмеспиз. Тууган, кошуна, тааныштарга таратат элек. Бербей калсак, кийинки теримден карыз болуп берчүбүз. Кийинчерээк киреше табууну көздөп сата баштадык.Өзбекстандан биздеги малинаны сатып алганы ишкерлер келчү. Ошолорго өткөрүп, 1 тоннага чейин түшүм алган учурлар болду.
Малдын кыгын салып, таза анан чоң-чоң түшүм алып жатабыз. Быйылкы биринчи терим 200 сомго чейин сатылды, негизи 100 сомдон башталган. Азыр эми күзгү терим башталды. Жылда эле малинанын баасы жогору болот. Май айында бышкан малинанын сабагын кыркып коебуз, экинчи теримге башка шак чыгарат. Өз убагында кыркылбаса, эски шактагы гүл кеч гүлдөп, түшүм кеч бышып калат. Ошондуктан өз убагында бутап турабыз», - деди ал.
Кайрынса Закирбаева жалгыз бой эне, 3 уул жана 1 кызы бар. Учурда небере жетелеп эле тим болбостон, малинаны өстүрүү сырларын келиндерине үйрөтүп келет.
