Turmush — Мамыры гүлү ден соолукка эмнеси менен пайдалуу? Дары чөптөр менен иштеген Жаңыл Курамева аймактык кабарчыга мамыры гүлүнүн дарычылык касиети тууралуу айтып берди.
Мамыры гүлү же эдельвейс өсүмдүктөрдүн татаал гүлдүүлөр тукумундагы уруусу. Көп жылдык өсүмдүк, бийиктиги 5–15 см. Топ гүлү – себетче же жарым чатырча (кээде себетчеси жалгыздан). Түктүү чоку жалбырактары жылдыз сымал кебетени түзөт. Кээ бирлери сабаксыз же сабагы жалбыракка айланып кеткен. Жалбырактары түрдүү формада, түктүү жана түксүз.
«Бул Кыргызстандын Кызыл китебине катталган. Кыргызстандагы 4 түрү Теңир-Тоо жана Алай тоо кыркаларында учурайт. Дарычылык касиети ичеги-карын ооруларына миңдин бири болуп саналат. Азырынча бул гүл медициналык жактан иликтөөгө алына элек. Чөптү август айында катып кете электе терип алып, кургатып, ич өткөктө кайнатып ичишкен. Азыркы тетрациклин дарысында эрвазин (эдельвейс) кошулмасы бар», - дейт Жаңыл Курамаева.
Аталган гүл тууралуу ар кандай уламыштар да бар. Мамыры гүлүн тапкан адам жаман энергиядан арылып, күчтүү болуп, ийгилик ар дайым коштоп жүрөт деп айтылат.
