Turmush — «Эмаком» курулуш компаниясы тарабынан ойнотулган лотереяда «Лексус 470» унаасынын ээси аныкталды. Бул тууралуу аталган компаниядан билдиришти.
«Эмаком» компаниясы жыл сайын жаңы жыл майрамынын алдында лотерея уюштуруп, бактылуу билеттердин ээлерин аныктап келет. 22-декабрь күнү өткөн салтанаттуу иш-чарада Кара-Суу районунун Кенжекул айылынын тургуну Алтынбек Саттаровдун үй-бүлөсү «Лексус 470» автоунаасына ээ болду. Ошондой эле чоң программадагы концерт уюштурулуп, белгилүү эстрада жылдыздары Гүлжигит Сатыбеков, Анжелика, Данияр Эрматов, Кызсайкал Кабылова, Малика Дина ырдады.
Буга чейин аталган компания куруп жаткан көп кабаттуу үйдөн батир алган кардарларга билеттер таратылган. Лотереянын алкагында тиричилик буюмдары: кир жуучу машина, муздаткыч, сыналгы жана башка белектер ойнотулду.
Майрамдык иш-чарага 800дөн ашуун адам катышып, 6 адам батир алууга 500 долларлык жеңилдетилген сертификаттарга ээ болушту.
«Компания үчүн бул чек эмес. Мындан ары жыл сайын 22-декабрь күнү лотерея уюштуруп, чоң программадагы концерт өткөрүү пландалууда. Өткөн жылы "Эмаком" компаниясы "Тойота Камри" үлгүсүндөгү унаа ойноткон. Ошондой эле курулуш компания өлкөнүн булуң-бурчуна жана коңшу мамлекеттерде да көп кабаттуу үйлөрдү курууну пландоодо», - деп айтылат компаниянын билдирүүсүндө.
